展城館 City Gallery為慶祝香港特別行政區成立25周年，特別設立規劃與基建展覽「繼往創未來」，包括大型戶外展覽場地「大未來歷棋」以及室內互動體驗區「創建香港新未來」。今次小編就同大家詳細講解吓戶外展區「大未來歷棋」係點玩啦！
首先，你可以喺棋盤起點掃描QR Code開始遊戲，然後喺手機上選擇棋子、擲骰子及按指示前進。沿途上你會遇到唔同嘅海、陸、空裝置，你可以閱讀相關有趣資訊或回答小問題以繼續前行。到達終點完成遊戲後，憑手機遊戲介面上嘅「完成頁面」，就可以到展城館接待處換領獎品！而棋盤上嘅部分裝置，即貨櫃箱、高鐵與門廊，亦設有唔同嘅小遊戲及AR體驗，帶俾你不一樣嘅樂趣！
1.貨櫃箱——「海運王」小遊戲：掃描貨櫃箱上嘅QR Code開始遊戲，將唔同顏色嘅貨櫃箱放落相應嘅貨船上以獲取分數。完成遊戲後，你仲會睇到有關香港船運嘅資訊添。
2.高鐵——「AR高鐵動感號列車」：掃描高鐵上嘅QR Code開始虛擬高鐵體驗，你除咗可以點開高鐵上「ℹ️」標誌獲取有關高鐵嘅趣味小知識之餘，亦可以同高鐵打卡。
3.門廊——「傳送門」：掃描門廊上嘅QR Code以打開傳送門，通往8個旅遊地點，喺「飛出香港」前，你仲可以拎住行李箱打卡。
除咗以上裝置，棋盤周邊仲有其他代表海、陸、空嘅展品，包括行李箱、壽司桌、航天走廊、港珠澳大橋等等，繽紛亮麗且造型趣緻，想點影都無難度！
展覽日期: 2022年7月6日至11月30日 (免費入場，無需登記)
開放時間:
星期一至四:上午10時至下午6時 *逢星期二休館（公眾假期除外）
星期五、六、日及公眾假期: 上午10時至下午7時
地址: 香港中環愛丁堡廣場3號 （近大會堂低座）
***拍攝僅作推廣作用，大家嚟玩時記得戴住口罩，遵守場內防疫指示就安全啦！
資料及圖片來源: 中環展城館 City Gallery / 編輯: Jetso Station 免費試用情報站